電影公司早兩日宣布會拍《尋秦記》電影版，當時老闆古天樂仲搵到19年前《尋秦記》電視劇嘅一班主要演員到場，包括林峯、宣萱、郭羨妮、鄭雪兒、滕麗名，學佢話齋真係「難儲過閃卡」！喺活動上古天樂就話，電影版發生喺電視劇故事嘅19年之後。見到佢哋，當堂啲回憶返曬嚟~

《尋秦記》電視劇版喺2000年開始拍攝，2001年响TVB首播，改編自黃易嘅同名小說。故事就講古天樂飾演嘅項少龍，本身係警察G4，穿越時空返咗去戰國時代嘅趙國，佢搵咗由林峯飾演嘅趙盤扮係真正嘅嬴政，又幫佢建功立業。期間，項少龍邂逅由宣萱飾演嘅烏廷芳、郭羨妮飾演嘅琴清、雪兒飾演嘅趙國公主趙倩，盡享齊人之福。睇返早兩日個活動，過咗19年幾位女主角都依然係咁靚。雖然大家仲未知道電影版嘅內容，不過電視劇個大結局提到，項少龍有個仔叫項羽，唔通電影版係講大個仔嘅項羽？咁套電影仲有無江華同《愛回家》KC飾演嘅陶總管先？

原圖取自網絡。