相信有留意開抗戰歷史嘅史友都聽過「台兒莊」呢個地方，台兒莊係而家山東省棗莊市小鎮，係徐州嘅門戶、大運河嘅咽喉，具有非常重要嘅軍事價值。抗日戰爭期間，日軍於1938年初為咗奪取徐州，就調集咗磯谷、阪垣師團，向中國軍隊發動進攻。

國民黨名將李宗仁喺3月就派出孫連仲嘅軍隊，進駐台兒莊同日軍決戰，另一方面湯恩伯嘅第20集團軍就喺嶧縣、棗莊以東側擊日軍。到咗4月，日軍向台兒莊發起猛攻，形勢非常危急，李宗仁親赴前線督戰，孫連仲同湯恩伯兩部兵分三路圍攻增援嘅日軍，危機解除之後，守軍大舉反攻，消滅劉家湖、三裏莊嘅日軍，其餘日軍殘部就向嶧縣、棗莊一帶撤退。呢場戰役中國軍隊派出4萬幾人參戰，以超過七千人傷亡嘅代價，成功擊退日軍。

圖片為李宗仁及前往台兒莊嘅軍隊，取自網絡。