早排聽到一段有關新文化運動同五四嘅分享，自不然諗起陳獨秀、魯迅、胡適等人物。當中陳獨秀可以話係五四運動嘅領袖，仲創辦雜誌《新青年》，响嗰段歷史中扮演重要角色！

陳獨秀1879年於安徽懷寧縣出世，生於一個官宦之家、書香門第，但佢自小已經討厭八股文，對科舉無咩興趣，喺辛亥革命嘅時候，佢就已經係反清嘅革命民主派。喺1915年，陳獨秀喺上海創辦《青年雜誌》（後改名為《新青年》），並且擔任主編，佢喺創刊號就發表咗一篇文章，題為〈敬告青年〉，提到以「人權」同「科學」嘅口號，又認為「人權」係有「民主」嘅涵義，自此《新青年》就成為反帝制、反封建嘅主要輿論陣地，胡適、李大釗同魯迅等亦先後參加《新青年》嘅撰述同編輯工作。

喺1919年1月，陳獨秀喺〈本誌﹝即《新青年》﹞罪案之答辯書〉入面提到，以「德先生」（民主）同「賽先生」（科學）成為新文化運動中心嘅目標，因為只有呢兩位「先生」可以救治中國政治、道德、學術同思想上嘅一切黑暗。陳獨秀對封建主義有深刻批判，令大批青年受影響，積極參加新文化運動。而有一班班革命青年仲仿傚陳獨秀，組織社團、創辦刊物，當中包括毛澤東喺長沙組織「新民學會」及創辦《湘江評論》。

原圖取自網絡。