南京大屠殺,係倖存者抹不走嘅悲痛。去年12月,倖存者佘文彬去到南京大屠殺遇難同胞紀念館「哭牆」,為牆上新雕刻嘅名字揭幕,佢爸爸嘅名字亦是其中之一。佘文彬爸爸佘培庚喺1937年日軍侵華期間,被日軍捉咗去做苦力,之後更加被殺死、棄屍長江,而媽媽就帶住佘文彬同妹妹走去到難民收容所避難。

佘文彬生前講過,事發時佢只有7歲,仲記得當年自己趴喺門罅,眼白白見住爸爸被帶走,從此一去不返。佘文彬喺「哭牆」新增姓名儀式上表示,以前掛住爸爸嘅時候,只可以睇吓佢嘅遺像,牆上加咗爸爸嘅名字之後,從此就多一個寄託。可惜嘅係,佘文彬參加完呢個儀式,了卻咗其中一件心事後就一病不起,直到上星期五凌晨病逝,終年89歲。

圖片為佘文彬為哭牆新增名字揭幕,取自網絡。