早兩日有同事問咗個好特別嘅問題，就係「波羅雞」好唔好食？一開始大家都認為佢講緊用菠蘿煮嘅「波羅雞」，點知有位百科書同事就話，「波羅雞」係同「波羅誕」有關，但係兩樣嘢同菠蘿大纜都扯唔埋？

其實「波羅誕」係同一間南海神廟有關，間廟又叫做波羅廟，喺古代已經係眾多海神廟之首，一千幾年以嚟，凡係行水路來華嘅朝貢使、商客同本土進出嘅海商，進出廣州嗰陣都要去轉南海神廟，祈求國泰民安、出入平安。而每逢農曆二月十一到十三日，就係南海神嘅生日，屆時嚟自四面八方嘅信眾會去祭拜同遊玩，民間稱之為「波羅誕」。

至於點解會有「波羅」呢個名？相傳喺古代，古波羅國有個叫做達奚嘅使臣嚟朝貢，佢回程果陣經過廣州，去咗南海神廟拜拜，仲將由古波羅國帶嚟嘅兩粒大樹菠蘿種子種喺廟入面，點知玩得太開心，唔記得上船，最後响廣州逝世，村民就形容佢生前眺望家鄉嘅情形為「番鬼望波羅」，慢慢間廟亦被稱為「波羅廟」，而每年去波羅廟朝貢、南海神生日嘅日子就叫做「波羅誕」。

今年「波羅誕」喺3月17至 19號於廣州黃埔南海神廟舉行，現場除咗有廣東省非物質文化遺產嘅傳統音樂、舞蹈等文化表演之外，仲邀請到嚟自香港同澳門嘅藝術團隊。唔單止咁，「波羅誕」廟會仲展出唔少非物質文化遺產傳統工藝，包括波羅雞、廣繡、乞巧工藝品、剪紙等13項工藝。至於「波羅雞」，佢係一種用雞毛、紙等材料黐成嘅好似毽嘅擺設，根本唔食得。

圖片嚟自網絡。