呢排有同事學車，無啦啦做做問題少年，問啲交通警喺邊度訓練，阿史答佢警察應該自己有學堂。睇返資料，原來警察駕駛學校係喺50年代成立。喺之前，香港警車嘅司機原來都唔係紀律部隊人員，係借用機電處加路連山車廠嘅員工嚟幫手嘅，直到後來，花名「魔鬼」嘅莫理遜警司提出，警車要由警務人員負責，以提升管理同行動效率，先令情況有所轉變。

喺1951年，警察駕駛學校响紅磡警署成立，之後曾經搬過去唔同地方作為基地。有駕駛學校前教官就提過，以前喺新界搞電單車訓練嘅時候，發生過唔少趣事，當時新界馬路附近仲有唔少農村，啲雞、鴨、牛、狗成日都會喺馬路上面走嚟走去，唔少學員都試過撞到呢啲小動物，搞到被農民追打或者索賠。賠償點計法？有農民見啲雞被撞死，就以「雞生蛋、蛋生雞」嘅方式去計賠償金，部份學員為咗息事寧人，最終足足賠咗成個月糧。以前農民會用牽牛繩帶啲牛出去活動、休息，有學員唔為意照衝過去，就被呢啲牽牛繩勒低，連帶後面嘅同袍都人仰馬翻，好彩無造成嚴重傷亡。

直到1991年，警察駕駛學校搬到去粉嶺芬園現址，經過合併、改組、換名之後，成為「警察駕駛及交通訓練中心」，繼續為警員提供訓練同進行考核。

圖片為警察喺警察駕駛及交通訓練中心接受訓練，取自網絡。