電影《唐伯虎點秋香》入面有唔少經典對白，好似上聯「圖畫裏，龍不吟虎不嘯，小小書僮可笑可笑」咁，認真有才，而周星馳飾演嘅唐伯虎就對出「棋盤內，車無輪馬無韁，叫聲將軍提防提防」。而另一套電影《倫文敘老點柳先開》入面，由張衛健飾演倫文敘、郭富城飾演柳先開，同樣非常搞笑。兩套戲好似無咩關聯？非也非也，因為《唐伯虎點秋香》句下聯，其實係出自《倫文敘老點柳先開》嘅主角之一、廣東狀元倫文敘嘅口中，唔係周星馳老作㗎。

倫文敘生於明朝成化三年，即公元1467年，係廣東南海縣黎涌人（現今佛山）。佢自幼家貧，父母種菜為生，邊有錢送佢去讀書。好彩倫文敘7歲嘅時候，附近何塾師見到佢咁可憐，於是免費收佢做學生。倫文敘因性聰敏，而且刻苦勤學，兩年之後就識得寫文寫書，每次考試都名列前茅，當時就已經名噪一時，有「神童」、「急才」、「鬼才」之稱。後來何塾師年老病逝，倫文敘因而輟學，但佢仍然好勤力，一面賣菜、一面鑽研經典。

喺1499年，倫文敘連續喺會試、殿試考到第一，高中狀元，做過翰林院修撰。而倫文敘三個仔以諒、以訓、以詵，亦先後考到解元、會元同進士。明武宗曾經御賜玉旨，喺黎涌村前起牌坊，上書「中原第一家」，以表揚倫文敘一家。

圖片為「中原第一家」牌坊及劇照，取自網絡。

資料來源：《文化承傳》禪城篇