正所謂「食在廣東」，廣東出名多小食、名菜，而作為廣東首府嘅廣州，喺上世紀20、30年代更處於美食界百家爭鳴嘅時代，嗰陣廣州著名酒家都有自己嘅招牌菜，好似紅燒大群翅、百花雞、大網鮑片同鼎湖上素等。不過，呢啲名菜都唔及得上江太史嘅家宴——太史宴。到底有幾巴閉？依家嘅太史五蛇羹、太史豆腐等系列菜式同佢有咩關係？

江太史原名江孔殷，籍貫廣東南海，係著名粵劇編劇家南海十三郎江譽鏐嘅父親。江孔殷係晚清最後一屆科舉進士，曾經入過翰林院，所以又叫做江太史。江太史嘅父親係上海嘅大茶葉商，而江太史喺民國初期已經係英美煙草公司華南嘅總代理，身家相當豐厚。

江太史雖然唔識煮嘢食，但就相當嘴刁，對廚師嘅要求非常之高，據講因此出咗太史五蛇羹、太史田雞、太史豆腐等巧手菜式。加上江太史交友又廣，成日都喺府邸「太史第」宴請賓客，孫中山、政界名人廖仲愷、京劇大師梅蘭芳、著名粵劇演員薛覺先等各界名人都曾經係座上客。江太史家宴嘅菜式唔單止做得精緻，仲新奇好味，所以好多達官貴人都以能夠入「太史第」品嚐太史家宴為榮。而每逢太史第有新菜式推出，廣州各大酒家即刻爭相仿效，冠以「太史」之名作招徠。依家香港部份酒樓都話自己師承江家，真真假假就等大家自行判斷喇。

圖為江太史像及太史五蛇羹，原圖嚟自網絡。