1914年第一次世界大戰爆發，歐洲列強忙於應付歐洲嗰邊嘅戰事，而民國就响大總統袁世凱帶領之下發展。點知喺1915年初，日本公使日置益喺日本述完職返中國後，就直接搵袁世凱，提出令中國喪權辱國嘅《二十一條要求》。二十一條主要分為五大項，當中包括允許日本繼承德國喺山東嘅利益、承認日本喺南滿同東蒙一帶有特權，而最差嘅第五項就係提到中國政府要聘用日本人做顧問、做警察等等。日置益仲警告，唔可以洩露呢個機密出去。

袁世凱政府就住《二十一條》同日本談判咗二十幾次， 期間不斷諗辦法拖延，佢吩咐外交人員逐條逐條同日本傾，而日本方面要求每個禮拜傾五次，但中方談判代表陸徵祥就扮忙，話只可以傾一次，最終妥協傾三次，但每次傾嘅時候陸徵祥都叫人斟茶、上點心，總之拖得就拖。後嚟日本開始心急，放棄咗第五大項，同時向中國發出最後通牒，而袁世凱為咗避免開戰同鋪路稱帝，最終接受咗日本嘅條件。日本提出嘅《二十一條》侵犯中國權益，引發國內知識份子對民族主義、愛國主義嘅熱情，更成為日後新文化運動嘅導火線。

圖片為袁世凱及日置益，取自網絡。