相信唔少史友都認識著名中國建築師林徽因，咁大家又知唔知，原來佢有份設計國徽同人民英雄紀念碑？

話說早喺1949年7月，中國人民政治協商會議（即係全國政協）籌備委員會，登廣告徵求國旗、國徽同國歌。喺9月尾，第一屆全國政協會議通過咗國旗、國都、紀年同國歌四個決議，唯獨係缺少國徽，導致10月1日開國大典上未有國徽出現。原來當時全國政協籌備委員會收返嚟嘅九百幾個設計，都唔符合中國特徵、政權特徵、形式須莊嚴富麗呢三個要求，於是全國政協就決定邀請專家設計國徽，由梁思成同林徽因夫婦領導嘅清華大學營建系設計小組，同以張仃為首嘅中央美術學院設計小組，展開國徽設計競賽。

雙方各自交咗設計之後，全國政協國徽評選委員會認為未夠好，不過就確立咗以中央美術學院設計小組其中一個設計嘅天安門圖案為原則，要求佢哋重新設計。最後林徽因就喺自己原先設計上加入天安門，並作出改良。原先設計以玉壁作為基本圖案，象徵團結、豐裕同和平，同時體現中國嘅傳統文化，另外加入金色齒輪、金色嘉禾，分別代表工同農，呢啲特徵最終獲得保留，經過改良後，被選中成為國徽。仲想知多啲人民英雄紀念碑設計？留返下次再講~

原圖取自網絡。