今日係愚人節，亦都係哥哥張國榮嘅死忌。16年前嘅今日，張國榮喺香港文華東方酒店留低封遺書，表示情緒受困擾，之後一躍而下，了結自己嘅生命。經理人陳淑芬之後證實，張國榮當時患上抑鬱症，並且努力接受治療超過一年，期間繼續努力作曲、錄唱片同出席活動。

哥哥嘅離去，令唔少歌迷同粉絲傷心不已。大家只能從《胭脂扣》入面嘅十二少、《倩女幽魂》嘅寧采臣、《東成西就》嘅黃藥師、《白髮魔女傳》善良得嚟又反叛嘅卓一航、《家有囍事》同男仔頭無雙表姐成對冤家咁嘅常騷，以及《霸王別姬》中執著嘅程蝶衣等等無數經典角色，去尋找哥哥當年嘅身影，懷念一代巨星嘅傳奇光芒。

原圖取自網絡。