早排講開清朝皇帝鍾意飲普洱茶，而出名長壽嘅乾隆都好鍾意飲茶，不過佢嘅最愛唔係普洱，而係三清茶。

至於咩係三清茶？之前無綫播嘅《延禧攻略》都有提到，乾隆邀請宗親出席一個茶會，順便介紹埋自己獨創嘅愛茶——三清茶。其實三清茶即係指梅花、佛手柑、松實，再加上新鮮採集嘅雪同西湖龍井泡製而成，因為呢三種材料都屬於清雅高潔之物，故而得名。唔好以為呢杯三清茶只係附庸風雅、得個賣相，其實佢仲有舒肝理氣、降低膽固醇嘅功效，尤其適合大魚大肉之後或者食得太滯果陣飲返一杯。三清茶一直係乾隆嘅最愛，乾隆仲為佢賦詩一首《三清茶》，詳細講解烹煮方法。

三清茶除咗有保健作用之外，仲係乾隆用嚟拉攏宗親、心腹嘅手段之一。話說乾隆會定期搞一個三清茶宴，親自邀請皇親貴戚或者受寵大臣赴宴，而每次參加嘅大概有20至30人，受邀嘅人簡直可以話係與有榮焉，相當於現代版嘅高級派對。據記載，乾隆在位期間就舉辦過44次三清茶宴，之後嘉慶、道光亦有辦過幾次，不過到咗咸豐時期清朝國勢漸衰，三清茶宴從此成為絕響。

圖為《延禧攻略》劇照，原圖嚟自網絡。