前排有同事話去學車要考筆試，阿史就叫佢千祈唔好「出貓」，嗰位同事當堂好有興趣，想了解吓舊時啲考生點出貓，同樣警方點樣發現。

有退休警察提及，以前有督察調查一宗交通意外嗰陣，發現肇事司機唔識字，除咗名字，其他一概唔識寫，於是就盤問司機當初點樣通過筆試兼攞到牌。個司機唯有老老實實供出，話當時用咗唔少錢，畀300蚊教車師傅，買入一支有「機關」嘅鉛筆。支鉛筆有六面，每一面分別寫住甲乙丙丁戊己，每一邊下面分別都有好多窿，第一排就代表第一題，如此類推，如果嗰排答案係A，就係有一個窿，B就會有兩個窿，C就會有三個窿等等，好似第二排有兩個窿咁，即係代表第二題答案係B。咁甲乙丙丁代表咩？原來係分別代表六份考試題目。一支筆，有曬成個題庫嘅答案。

大家可能疑惑，咁嗰位文盲考生點知自己考緊邊份試卷？答案就係全靠內應。考生入到考場，身為內應嘅監考見到你揸住枝咁特別嘅鉛筆，就會輕輕指一指要用邊一面嘅答案，去答相應嘅試卷。件事被警察揭發之後，當局自然出招，禁止再用「機關」鉛筆。阿史聽講而家考筆試都係用電腦考，就無得出蠱惑。其實為咗自己、他人同路面安全，真係要乖乖哋考好嗰試喇。

原圖取自網絡。