唔少人都知，北宋大文豪蘇東坡嘅從政之路一啲都唔順遂，一次又一次咁被貶去窮鄉僻壤，遠離權力中心，佢其中一個被貶嘅地方，就係宜家嘅廣東惠州。蘇東坡喺惠州度過咗兩年幾謫居生活，除咗繼續文學創作，為後世留低唔少豪邁大氣、空靈雋永嘅作品之外，佢仲為惠州百姓做咗唔少實事，造福大眾。

蘇東坡抵達惠州無幾耐，就發現當地四面環水，百姓出入好唔方便，於是佢提出修築「兩橋一堤」，即係喺惠州西湖兩邊各修建一段堤，然後喺中間建造九間飛樓，作為橋樑連接西湖兩端。蘇東坡嘅提議得到當地官員支持，工程展開之後，佢自己每日都會親力親為，去現場視察施工進度。但係工程去到一半嘅時候，就出現咗資金不繼嘅情況，蘇東坡唯有將自己最值錢嘅財產——皇帝賞賜、嵌有犀角嘅腰帶變賣，又寫信俾細佬蘇轍求助，將賞賜嘅黃金捐出嚟解決問題。八個月之後，「兩橋一堤」終於建成，惠州百姓為咗紀念蘇東坡嘅功勞，就將湖中堤壩命名為蘇堤。

除咗修築堤壩之外，蘇東坡仲為惠州農業引入「秧馬」。所謂嘅「秧馬」，即係由農夫騎喺木馬形嘅農具上面，喺田入面一邊向前行，一邊插秧。本嚟農夫插秧果陣要彎低條腰，整完會好攰，但如果用咗「秧馬」，就既可以慳體力，又可以提高效率，一舉兩得。無過幾耐，惠州百姓覺得「秧馬」方便好用，都用「秧馬」嚟耕種。

圖為惠州西湖同蘇東坡像，原圖嚟自網絡。