之前去開中央圖書館,見到有個五四運動圖片展,展出包括北京學生示威要求取消「二十一條」、北洋軍閥拒絕於《巴黎和約》上簽字的報道、以及香港抵制日貨以示支持等珍貴嘅歷史圖片,仲有年輕時期嘅周恩來同鄧小平等照片。點解會有依個展覽?原來今年係五四運動100週年,相信大家如果行完展覽,可以了解更多當時嘅歷史。 

成個展覽最特別嘅地方,就係香港响五四運動時嘅情況。1919年5月4日,北京學生運動爆發,香港民眾湧去啲日本商店掟石頭示威,並且高呼「抵制日貨」口號,持續幾個鐘都無法平息,直至日本商店關門停業為止。而各大百貨公司,例如先施、永安、大新、真光等,都宣布多採購國產絲綢、蘇杭雜貨,又歡迎各界人士檢查有無「仇貨」。當時嘅太古洋行副買辦蔡功譜話日本海味佔咗好大部份嘅出口,好似魷魚、鮑魚、江鰩柱剩係運到中國,批評日本每年從中國攫取唔少金錢,仲要用嚟製造武器侵略中國,佢呼籲三年唔食日本海味,令日本變窮,無能力侵略中國。雖然番說話係誇張咗少少,但已經顯示各階層嘅香港人都一條心對外。

除此之外,當時有香港學生舉起「愛國傘」走上街頭示威,而喺日本領事要求之下,港英政府禁止學校使用有提倡國貨、抵制日貨嘅課本,仲派人搜查學校同書局,又唔准報章有煽動抗日愛國,或者損害日本嘅字句。五四運動其實仲有好多值得分享嘅歷史片段,下次再同大家講多啲~