早兩日同同事出去食飯，由於同行人數眾多，行喺條街度都真係幾掗拃。咁啱後面有個叔叔趕住爬頭，左穿右插，連續撞親兩三個同事，搞到阿史同事忍唔住鬧咗佢一句：「成隻油炸蟹咁！」有兩個後生啲嘅同事就問阿史咩叫「油炸蟹」，哇，呢個詞宜家真係好少會有人講，阿史都差啲唔記得。

「油炸蟹」其實同我哋平時所講嘅「掗拃」有啲似，但就多咗橫衝直撞、唔識避讓嘅意思。事關蟹又有腳又有鉗，平時打橫行已經好掗拃，但活生生嘅蟹掂到其他嘢都仲識縮埋腳同鉗，但油炸蟹就唔同喇。油炸蟹本嚟係街頭小食，顧名思義就係用成隻蟹點埋粉漿一齊落鍋炸，炸完之後，成隻蟹都硬晒，啲手手腳腳全部伸到直一直，掗拃過生蟹之餘仲唔識縮返埋啲手腳，亦都因為咁，油炸蟹就被大家用嚟形容有啲人喺度橫衝直撞，完全唔識得避人。

原圖嚟自網絡。