上次講廣東狀元倫文敘，有史友問起柳先開，今次就簡單講講。喺電影《倫文敘老點柳先開》入面，柳先開話自己係書法家柳公權個仔，但事實上柳公權係唐朝人、柳先開係明朝人，差成幾百年，所以電影都係睇吓、笑吓就算，唔好當真呀！

相傳柳先開係湖廣人（現今湖北），出身自書香世家，但為人非常自負，喺倫文敘上京考會試嗰陣，倫文敘住喺廣東會館，而柳先開就住附近嘅湖廣會館。柳先開喺湖廣會館門口寫咗副對聯「廣東花未發，湖北柳先開。」而倫文敘就覆返句「湖北柳先人不中，廣東花發狀元來。」文人要鬥，都鬥得文雅過人。

之後去到會試，倫文敘考第一，柳先開就考第二。殿試定生死時，二人不分上下，結果就以作詩為最後考題。皇帝出嘅題目係「明月」，柳先開就寫咗「讀盡天下九州賦，吟通海內五湖詩；月中丹桂連根拔，不許旁人折半枝。」而倫文敘就寫「潛心奮志上天台，瞥見嫦娥把桂栽，偶見廣寒宮未閉，故將明月抱回來。」最後因為倫文敘首詩氣魄更大、想像力豐富，被皇帝點做狀元。

不過最令人詫異嘅係，正史中並無柳先開嘅記載，佢只係民間傳說人物，所以大家都係當故仔聽吓好喇。

劇照取自網絡。