早排提過唔少香港女警嘅歷史，好似首位女警名為許錦濤（又名高健美），後嚟去到1995年，警隊強制要求新入職嘅女警接受槍械訓練同埋配槍，令佢哋成為陀槍師姐。唔講唔知，其實早喺1992年，警隊就已經成立咗一支全女班嘅防暴警察Tango連（T大隊），T大隊嘅女警屬於兼任制，有需要嘅時候就會集合出勤，大型公眾活動好似年宵花市、煙花匯演、公眾集會同遊行等，都會見到佢哋嘅身影。T大隊嘅工作包括人群管理、支援機動部隊，以及喺大型公眾活動中照顧長者、兒童及婦女等。

2005年世貿部長級會議喺香港舉行，當時有大批韓國農民嚟香港舉行反世貿示威，警方就派出PTU女警同T大隊打頭陣，T大隊同示威者對峙周旋，完全係巾幗不讓鬚眉。Tango連同PTU一樣，需要接受內部保安、圍堵策略、人群管理同控制技巧等訓練，一啲都唔簡單。喺2013播出嘅TVB劇集、周勵淇主演嗰套《女警愛作戰》入面，亦曾經出現過Tango呢個隊伍。

原圖取自網絡。