之前提到時事漫畫《時局全圖》,相信大家對張畫都好有形象,其實清末時期好多諷刺局勢嘅漫畫,好似呢幅《官與民之擔負》咁,於清宣統二年(1910年)嘅《神州五日畫報》中刊登。幅漫畫描繪老百姓好辛苦咁孭住一個大包袱,寫住「外債賠款及一切捐稅」,大包袱上面企咗一個手抱「責任內閣」嘅官吏,諷喻當時喺列強入侵中國、不平等條約、外債賠款同埋捐稅嘅嚴峻局勢之下,對老百姓造成非常沉重嘅負擔。簡單一幅畫,形象化咁反映出當時社會民生以及老百姓所面對嘅困難。