標點符號我哋依家就日日見、日日用喇，不過原嚟中國開始廣泛使用標點符號都只不過係近一、二百年以嚟嘅事，因為古代係唔興用標點符號嘅，而標點符號亦都無宜家咁多。

有揭過吓中國古籍嘅史友都會發現，古人係無用標點符號嘅習慣，點斷句真係要靠自己理解。以前嘅私塾老師雖然會教學生斷句，但學生掌握咗基本嘅句讀能力之後，老師就唔會再用斷句嘅符號教書，所以啲符號非常少用。鴉片戰爭之後，編修《海國圖志》嘅魏源提出「師夷之長技以制夷」，西方標點符號先被介紹入中國。而中國第一個用新式標點符號著書立說嘅人，係清代嘅翻譯家嚴復，佢喺《英文漢話》入面第一次用到新式標點符號，對往後中國語言文學嘅發展有重大意義。

至於將新式標點符號推廣，就同後嚟嘅新文化運動息息相關，《新青年》雜誌自創刊日起就一直堅持用新式標點符號，而作為新文化運動代表之一嘅胡適、學者劉半農等人亦積極提倡喺文章中使用新式標點符號。1918年，胡適喺寫《中國哲學史大綱》果陣，增刪咗佢之前喺《論句讀及文字元號》對句讀同文字符號嘅論述，令呢套新式標點符號成為中國第一部國家頒行嘅標點符號方案雛形。

1930年，教育部頒佈咗《劃一教育機關公文格式辦法》，由句讀、行款、用語幾方面統一咗機關文牘。1951年9月，政府出版署公佈《標點符號用法》，對14種標點符號嘅用法作出規範。再後嚟經過不斷更新改良，先有咗依家我哋用開嘅標點符號用法同規則。

原圖嚟自網絡。

資料來源：金羊網