今屆DSE如火如荼咁進行緊，個個考生都落力應試想考個好成績。自身努力之餘，有無考生會入文昌廟拜一拜，睇吓有無機會被文曲星關顧吓呢？文曲星相傳係掌管考試同文運嘅神仙，佢手上有一支筆，邊個被呢支筆點中，就可以高中。講開文曲星，香港深水埗三太子廟有一個文昌殿，自2011年起，每逢新學年都會喺廟內舉辦開筆禮，邀請高僧免費為參加開筆禮嘅學子祈福，保佑學子係新學年學業進步。廣州西關近排都舉行咗個開筆禮，但就同香港嘅有啲唔同喇。

喺啱啱過咗嘅禮拜一，廣州西關荔枝灣景區文塔舉行咗場開筆禮，因為民間傳說話文塔係供奉文曲星、掌握文人功名同命運嘅神塔。相傳喺清代時期，廣東省出過嘅三個狀元莊有恭、林召堂同梁耀樞都曾經去過文塔祭拜祈福。廣州個開筆禮大概有30個學生參加，佢哋著住漢服，先習禮、敬拜，代表要「先正衣冠，後明事理」，即係話要學生自細就學習禮儀同識得尊師重道。跟住就由師長用朱砂喺學生嘅額頭度點上紅痣，寓意學生從此眼明心明，鍾意讀書同埋讀書叻啲。之後學生學寫個「人」字，寓意做人首先要堂堂正正、頂天立地。最後就係喺文塔祈福，學生繞住文塔行三個圈，咁樣就大致禮成喇。

其實開筆禮並非香港、廣州特有，全國各地每年都會陸續舉行儀式。而喺香港，除咗三太子廟之外，華人廟宇委員會旗下嘅北帝廟、洪聖古廟都有舉行，而黃大仙廟舊年亦都舉辦咗香港首個敬拜孔子嘅開筆禮。

原圖嚟自網絡。