唔知大家有無食過光酥餅？你哋又鍾唔鍾意食呢？原嚟光酥餅仲有個阿哥，兩款餅用料相似，可以話係「血脈相連」，不過隻餅就比光酥餅大好多，分分鐘大過你塊面添，佢就係西樵大餅喇。西樵大餅究竟係點嚟嘅呢？據《西樵山志》記載，西樵大餅係由明朝吏部尚書方獻夫發明，至今有成幾百年歷史，成為廣東著名小吃之一。

方獻夫係廣東南海人，據說佢平時都會喺屋企食完早餐先上朝，點知有日下人遲遲未送早點過嚟，於是方獻夫就去廚房自己搵嘢食，見到廚房有啲麵團，就用啲雞蛋、糖加落麵團度，烤成餅帶上朝房度食。啲同僚聞到方獻夫帶嚟嘅餅發出陣陣香味，都忍唔住問呢個係咩餅。方獻夫思鄉情切，就答話：呢個係西樵大餅，於是呢個餅嘅大名慢慢廣為人知。後嚟，方獻夫返鄉下，隱居廣東南海西樵山，亦都將西樵大餅嘅製餅方法傳授開去。由於西樵大餅大大個，又好味又唔易變壞，從此成為古人遠行必備嘅乾糧，亦都係當地喜慶宴席、送禮嘅佳品。

原圖嚟自網絡。

資料嚟自《文化•傳承•南海》。