金像獎頒獎典禮於今晚舉行,記得上年嘅金像獎入面,演員馮淬帆將終身成就獎頒畀恩師楚原,相信勾起唔少七八十後嘅回憶。講起馮淬帆,又點可以唔提《福星系列》同《精裝追女仔》系列?幾套電影可以話响八十年代「打橫行」,深受觀眾歡迎。

馮淬帆爸爸係粵劇伶人馮鏡華,佢1965年加入麗的映聲,之後跳槽無綫,由黑白到彩色電視年代,主演過幾部劇集,好似六十年代嘅《夢斷情天》、百集偵探劇《法網難逃》、《執到寶》等。

至於馮淬帆點樣踏入影壇?當年佢受楚原邀請,拍咗首部電影《黑玫瑰之三之紅花俠盜》。而《福星系列》同《精裝追女仔》系列令觀眾留低深刻印象,當中有唔少經典情節,好似《精裝追女仔》入面,馮淬帆飾演嘅劉定堅被整蠱,誤用「收縮水」搞到全身痙攣,配合埋發哥周潤發嘅歌聲,認真經典。當時睇完後,搞到阿史一度以為搽完「收縮水」真係會令皮膚「乸」埋一嚿。

笑片最緊要笑得出,連馮淬帆拍嗰時都覺得好笑,佢提過拍《五福星》嗰期成班人輪流忍笑失敗,搞到成日NG,等到齊齊忍到笑,已經拍咗成幾十次。其中有場戲拍馮淬帆同曾志偉等其他演員被一班潮州人圍住,逼佢哋講潮州話,曾志偉就講咗句「些funk易呢funk(SevenEleven)」,笑到馮淬帆碌地。不過大受觀眾歡迎嘅笑片背後,馮淬帆本身比較嚴肅,佢話自己唔中意啲笑片,覺得無咩深度同成就感,仲搞到佢被定型,令觀眾忘記咗佢本身嘅演技。咁點解仲會拍笑片?演員都要搵食嘅。

雖然馮淬帆早年已經移居台灣,不過佢近年都有返嚟香港,參與電影相關工作,觀眾偶然都睇到佢嘅身影。

劇照嚟自網絡。