上次講起《鐵探》惠英紅個角色，有史友提到袁偉豪飾演嘅阿sir尚垶係參考「無味神探」陳思祺嘅故事。阿史都覺得有啲似，尚垶同陳思祺都一樣，都經歷過頭部中槍，大難不死之後，破咗唔少大案，一生傳奇。

陳思祺喺1983年加入警隊，响1992年4月，有四個匪徒手持AK47步槍打劫，目標係彌敦道嘅周生生珠寶金行。班悍匪一共搶走總值兩百幾萬元嘅金飾。當時27歲、隸屬東九龍總區重案組第二隊嘅高級督察陳思祺帶住12名隊員，喺大角咀利得街搜索匪徒，正當佢哋喺一幢唐樓6樓單位埋伏嘅時候，匪徒突然向門外開槍掃射，撤退期間陳思祺頭部中槍，子彈打入眉心，從下顎穿出。

經過兩個幾月搶救之後，陳思祺奇蹟生還，但就失去味覺同嗅覺，其後復職駐守重案組，偵破多宗大案，包括淘大花園尼龍袋藏屍案、秀茂坪童黨燒屍案等等。當中淘大花園尼龍袋藏屍案， 陳思祺帶住秀茂坪重案組第二隊接手，唔夠四粒鐘就閃電破案，拘捕女死者嘅丈夫，令「無味神探」嘅稱號更加廣為人知。

喺1995年，導演杜琪峰將陳思祺嘅事蹟改編成電影《無味神探》，以陳思祺為藍本嘅男主角阿海由劉青雲飾演。2012年，陳思祺證實患上末期肺癌， 三年後年因癌細胞擴散引起併發症不治，終年51歲。

原圖取自網絡。