「冷得我騰騰震呀」,鍾意粵劇嘅史友,肯定有聽過新馬師曾嘅大名,就算無睇過佢做戲,都一定聽講過經典劇目《萬惡淫為首》。粵劇名伶新馬師曾原名鄧永祥,係廣東順德人,戲裡戲外都尊稱佢一聲「祥哥」。佢嘅父親鄧祺係粵劇迷,新馬師曾自細受粵劇薰陶,9歲喺茶座表演果陣時得到老行尊賞識,之後轉介佢去跟粵劇前輩何壽年學戲。新馬師曾10歲登台,有神童嘅美譽,何壽年見佢鍾意模仿馬師曾嘅唱腔,於是幫佢改藝名做新馬師曾。

新馬師曾多次參加東華三院嘅《歡樂滿東華》電視籌款節目,仲喺度節目獻唱《萬惡淫為首》等作品,深入民心,所以又有「慈善伶王」嘅稱號。多才多藝嘅佢唔單止識唱京劇、粵劇,仲識得自編自導,例如《萬惡淫為首》、《光緒皇夜祭珍妃》等。

可惜新馬師曾除咗遺傳父親嘅粵劇嗜好之外,仲染上父親好賭嘅陋習。新馬師曾有段時間好中意賭錢,輸咗嘅錢數以千萬元計,計返當年物價,嚿錢可以買得起成條街咁滯。好彩佢最終改過自新,戒賭成功,之後入股澳娛股權、喺西貢買地、開楚留香酒樓、設立永祥唱片公司等,投資有道,變成豐厚身家嘅大老倌。至於佢逝世後家庭成員為咗爭遺產而對簿公堂,已係後話。

原圖嚟自網絡。