唔少七八十後都應該記得，麥當勞家族當初人強馬壯，出咗唔少「代言人」，除咗麥當勞叔叔，仲有滑嘟嘟、漢堡神偷、小飛飛咁，成為四大吉祥物。不過近年最多都剩係見到麥當勞叔叔，究竟其他三隻吉祥物去咗邊呢？

成身紫色嘅滑嘟嘟第一次同觀眾會面係喺1971年，麥當勞當時嘅廣告中係將滑嘟嘟設定做「邪惡」角色，成日偷人哋嘅奶昔，之後被麥當勞叔叔潛移默化，先慢慢變成好人，係麥當勞叔叔嘅好朋友之一。早年好多麥當勞廣告、漫畫、擺設，都仲有滑嘟嘟嘅蹤影。不過，佢喺1997年之後就開始退隱，唔少網民仲笑佢已經過檔做咗「媽咪麵」嘅代言人添。

至於小飛飛，雖然係麥當勞家族嘅第一個亦係唯一一個女角色，但人氣就好一般，1980年首次登場，1997年就提早退休，有網民仲笑佢可能已經被KFC捉咗去整炸雞。仲有漢堡神偷，成日著住件黑白間條囚犯衫，出名買嘢唔排隊，又咀賤又呃薯條食，同滑嘟嘟同期出道，但一樣喺97年無影。呢三隻吉祥物嘅消失原嚟有跡可尋，喺1997年嘅麥當勞廣告入面，開心樂園餐出咗套滑嘟嘟、漢堡神偷、小飛飛同麥當勞叔叔嘅珍藏系列，仲講明「錯過今次以後就未必買得到」，唔知有無史友有買嚟收藏呢？

原圖嚟自網絡。