平時見到重要人物訪港或者特首落區,附近都會有幾個表情嚴肅嘅「西裝友」,好認真咁一眼關七,佢哋就係G4喇。大家熟悉嘅視帝馬德鐘入娛樂圈之前其實都做過G4,仲保護過英國戴安娜王妃,真係唔簡單。

G4正式名稱係要員保護組(VIP Protection Unit),因為屬於G部門第4組,所以叫G4。香港G4响1974年成立,負責保護外國政要、特首、前特首、訪港國家領導人等,最初係由英國特種空勤部隊教授保衛原則同技巧,近年逐漸發展出一套保衛理念。G4執勤嘅時候,需要佩備耳機、避彈衣同手槍,如果保護對象受到襲擊,G4分分鐘要撲出嚟擋子彈。

要成為G4一啲都唔簡單,首先警員不論男女,都要接受為期3日2夜嘅遴選過程,通過體能、游泳、搏擊以及唔同嘅演習,包括抬起50公斤沙包,確保可以响突發情況時獨自抬走VIP,另外會透過演習測試警員嘅團隊精神同領導才能。通過遴選之後,入選者要接受10個禮拜嘅訓練,內容包括槍械、戰術、自衛術同急救等等,有咩差池隨時都要out。

圖為馬德鐘,取自網絡。