上個禮拜同大家講過新式標點符號嘅發展簡史，今日再分享多少少關於標點符號嘅趣事。話說外國新式標點符號啱啱被引入中國果陣，由於仲未廣泛使用，又缺乏法規規管，唔好講話普通人，就連唔少學者都唔係好識用。大家仲記唔記得阿史好耐之前講過國學大師章太炎，佢幫自己四個女改咗啲鬼死咁難讀嘅名，搞到班女差啲嫁唔出？章大師雖然學識淵博，但佢嗰陣對於新式標點符號都唔係好了解，仲差啲怪錯前嚟請教嘅胡適添。

話說喺五四運動入面提倡白話文嘅胡適，亦積極倡議使用新式標點符號，佢喺編寫《中國哲學史大綱》嗰陣都有用到標點符號。據講本書出版之後，胡適仲特登送咗本俾章太炎，請佢指教。胡適喺扉頁上面工工整整咁寫咗「太炎先生指謬」，下面仲有自己署名，而兩個人嘅名旁邊都加咗個專名號。章太炎見到自己個名隔離唔知點解多咗一劃，嬲到即場鬧人：「何物胡適，竟在我名下胡抹亂畫！」直至章太炎望到胡適個名都有一劃，先醒覺胡適原嚟唔係畫蛇添足，原來只係用咗專名號嚟標示名字，咁先下咗啖氣。

原圖嚟自網絡。