啱啱放完復活節，大家有無去邊度玩返轉，叉一叉電？阿史就同文青朋友齊齊去咗轉澳門，除咗食自助餐之外，仲參觀唔少景點，尋找歷史足跡，好似國父紀念館咁，唔單止國父孫中山當年住過，佢嘅元配夫人仲住到過世，可以話係從另一個角度，見證孫中山嘅人生傳奇。

紀念館位置原本係孫府，初初係孫中山响澳門行醫時，哥哥孫眉買嚟畀屋企人住，1918年起成為孫中山元配盧慕貞嘅住所。不過1930年兵頭花園後邊嘅軍火庫爆炸，孫府被波及著火，變成危樓。收到澳門政府賠償之後，孫中山囝囝孫科加入伊斯蘭教色彩，將孫府大執成目前嘅紀念館格局。盧慕貞响孫府一直住到1952年過世，而棟建築六年後被政府改設為國父紀念館。

紀念館入面展示孫中山銅像以及「天下為公」之外，仲有孫中山响澳門行醫同埋响廣州任職大元帥期間所用嘅家品、寫自傳嘅真跡、佢同革命烈士嘅合照等等，而孫中山半身像兩旁則擺放中華民國旗。國父紀念館唔駛門票，自然方便唔少遊客，不過大熱天時居然無冷氣，阿史仲見到有職員响度煮飯食，唔通佢哋想貫徹返當年故居嘅用途，還原生活化面貌？