逢年過節，中國人嘅傳統慶祝活動嚟嚟去去都係得舞龍舞獅？梗唔止喇，仲有舞鰲魚。鰲魚係一種嘴邊有鰓、頭頂有角，龍首魚尾嘅魚。喺廣州番禺嘅沙涌村，鰲魚舞比舞龍舞獅更加常見，相傳係由浙江嘅「魚燈舞」傳入發展而成，至今已經有六百幾年歷史。

番禺鰲魚舞係廣東省非物質文化遺產之一，相傳源自一個神話傳說：有個書生上京赴考，途經「美人國」嘅時候被一班妖女戲弄。為咗擺脫妖女，書生走到去海邊，向喺度嬉戲嘅兩條一雄一雌嘅鰲魚求救。鰲魚本身係由金色嘅鯉魚吞咗海入面嘅龍珠變身而成，功力自然高過一般鯉魚。講返書生，鰲魚聽到佢求救，於是揹住書生渡海。之後書生考中狀元，喺謁見皇帝嘅時候企喺金鑾殿階梯前嘅鰲魚頭雕刻之上，於是有咗「獨佔鰲頭」嘅佳話。後嚟書生變成文魁星，為咗報答鰲魚嘅救命之恩，佢重臨大海，為鰲魚簪花掛紅，點化成仙，而鰲魚亦都被鄉民奉為保護神。  

宜家番禺鰲魚舞就係根據呢個故事改編而嚟，鰲魚舞主要有三個角色，其中兩個扮演鰲魚，仲有一個飾演書生（狀元兼文魁星）。三個舞者配合鑼鼓伴奏，表演傳說中嘅故事，再將鰲魚出洞戲水、擦鱗、擦角、出遊、食茜草、雙魚、躍龍門等一系列動作，透過舞者用肩、背、肘、手等部位操縱魚口開合，同埋操縱魚身嚟展現。近年嚟，鰲魚舞唔單止係沙湧村嘅鎮村之寶，仲喺南韓麗水世博會等大型活動演出，成功衝出中國，真係名副其實魚躍龍門喇。

原圖嚟自網絡。