早排去咗轉香港大學搵朋友，雖然港大無中大咁廣闊嘅面積，但佢係香港歷史最悠久嘅大學，响港督盧吉任內構想、籌備同設立，過程一啲都唔簡單，仲因為商人唔肯捐錢，一度搞到盧吉好頭痕添。

盧吉早於1908年1月已經提出要喺香港開辦大學，話係為咗香港嘅前景同中國嘅發展，而創辦大學亦有助英國同列強競爭、鞏固英國响華南嘅影響，佢嘅目標仲好遠大：希望港大可以成為遠東嘅牛津同劍橋。之不過籌募經費嘅過程一啲都唔輕鬆，盧吉曾經寫信俾太太，話香港有部份英國商人擔心中國人接受教育之後會成為勁敵，所以唔肯捐錢。盧吉夫婦嘅老友、嚟自印度商人麼地見佢哋咁熱衷建立大學，好慷慨咁帶頭捐咗15萬港元，其後盧吉再向香港嘅其他英資公司、華商及華人團體等勸捐，截至1910年12月，香港政府一共籌到超過120萬元經費。

香港大學喺1912年3月11日正式成立，當時只有文學院、醫學院同工程學院，最初有大約70個學生。喺1916年，香港大學舉行第一屆畢業禮，當時只有23個畢業生，去到1921年香港大學先正式收女學生。

原圖取自網絡。