近一百年前嘅五四運動，一班學生力爭青島主權，遊行期間外交部總長曹汝霖嘅屋企被放火燒毀，而駐日公使章宗祥就被學生打咗一身。阿史今日就講吓點解佢哋會被人當做賣國賊。

曹汝霖同章宗祥都係清末時期一批較早去日本留學嘅中國學生，畢業之後返國，撞正清廷推新政、用人之時，就加入咗政府機關。1913年袁世凱就任大總統之後，曹汝霖就出任外交部次長，無幾耐日本就提出令中國喪權辱國嘅《二十一條要求》，曹汝霖同時任外交部總長陸徵祥代表中方同日本傾，最終經過多輪談判之後，日本放棄咗最差嘅第五項要求。而曹汝霖就因為被指有份推動中國簽署，而被指係賣國賊。至於章宗祥係擔任駐日公使期間，協助段祺瑞政府同日本建立更緊密聯繫，達成唔少秘密借款協議，代價係出賣山東鐵路權益。

喺五四運動期間，有大約5000名、來自北京13間大專院學嘅學生遊行，高舉「誅賣國賊曹汝霖」等等標語表達不滿。當遊行隊伍去到曹汝霖屋企嘅時候，啲學生衝咗入去，但曹汝霖已經唔喺度，於是班學生就毆打原本去作客嘅章宗祥，並且放火燒屋。

雖然兩人被指係賣國賊，不過有分析認為佢哋只係職業官僚，因為當權者希望同日本打好關係而受重用，佢哋只係聽命行事，而章宗祥被打之後，聽到學生被拘捕，反過嚟叫老婆以佢嘅名義寫文件，幫手保釋學生。曹汝霖同章宗祥喺五四運動被免職之後，完全退出政壇，喺抗戰時期亦無擔任偽政權嘅職位。