星期六中午見到電視播《我愛香港》，覺得嗰形式同獎門人系列分別唔大。講開長壽節目超級無敵獎門人，好多環節例如「辣辣壽司邊個食」咁，都深入民心。唔好睇小依個環節，當年元綠壽司就係靠佢帶動迴轉壽司熱潮，成功發圍。

講元綠壽司之前，先講講香港人好中意食嘅迴轉壽司到底點嚟。話說當年有位日本老闆白石義明，開咗間好受歡迎嘅立食壽司店，有日佢去參觀朝日啤酒廠，見到用運輸帶處理啲啤酒，於是利用類似方法，製作半月形嘅不鏽鋼帶嚟「運送」壽司，最終1958年响大阪開設第一間迴轉壽司店元祿壽司。

至於曾經响香港非常盛行嘅元綠壽司，於九十年代初引入，一開始以碟碟10蚊做招徠，高峰時期店鋪開遍廣九新界，唔單止開成幾十間分店，仲成為香港第一代迴轉壽司店。不過隨住其他壽司品牌陸續進駐香港，元綠分店日漸減少，後嚟推出火鍋放題、壽司任食等希望力挽狂瀾，不過都無咩效果。2016年2月，位於天水圍嘅最後一間元綠壽司執笠，令香港一代迴轉壽司品牌畫上句號。

寫寫吓稿，兩位同事無端端嘈起上嚟，為咩？一個話細個食開嘅係叫「元綠」壽司，另一個堅持那些年係叫「元祿」。大家仲記唔記得？

原圖為白石義明嘅迴轉壽司店以及香港元綠，取自網絡。