之前介紹過警察嘅特種部隊好似G4、機場特警咁，今次就繼續介紹另一支部隊──跟蹤支援隊。跟蹤支援隊工作非常神秘，綽號係「攻擊隊」、「Hit Team」，隸屬刑事情報科嘅行動支援組，負責支援同保護進行危險跟蹤任務嘅跟蹤組（俗稱「狗仔隊」），以及執行危險性高嘅拘捕行動。Hit Team喺上世紀90年代成立，當時香港發生多宗悍匪持械劫案，執行跟蹤任務隨時爆發槍戰，為咗保護跟蹤組成員，於是就成立咗呢支Hit Team。

Hit Team成員大多數嚟自衝鋒隊、飛虎隊、機場特警同要員保護組等，佢哋熟悉槍械，擅長射擊同埋近身作戰。除此之外，Hit Team成員亦需要好強嘅觀察力同記憶力，以及喺疲憊狀態下保持專注。投考Hit Team嘅警員唔單止體能要叻，仲要睇閉路電視，考吓記唔記得片裡面嘅內容，包括人數、出入人士衣著同埋特徵等，絕對唔簡單。Hit Team一收到命令，隨時需要同悍匪駁火，完成任務後極速撤離，交由其他同袍收尾。2003年12月，Hit Team就聯同飛虎隊攻入油麻地一個單位，拉咗賊王季炳雄同佢嘅同黨，起獲大批軍火，Hit Team可以話係功不可沒。

原圖取自網絡。