大家仲記唔記得中學有篇叫《背影》嘅課文？呢篇係著名作家朱自清嘅代表作，講嘅係朱自清父親朱小坡送朱自清上車前嘅小故事，短短千五字就寫出咗令人感動嘅父子之情，可謂現代散文經典之作。感人背後，朱自清居然同爸爸冷戰咗兩年咁耐？

朱自清生於江蘇省東海縣，20歲就考入北京大學哲學系，成為新潮社嘅成員，仲喺五四運動期間做過平民教育演講團團員。畢業之後，朱自清去過溫州、寧波等多間中學教書，其後到清華大學任教。1917年，朱自清嫲嫲病逝，佢返去奔喪，朱小坡變賣家產，又借咗大耳窿先勉強辦完喪事。之後，朱小坡送朱自清去浦口火車站搭車，就出現咗《背影》描述嘅場景。

其實喺《背影》情節發生前，朱自清同父親已經兩年無見過面。事源朱自清不滿自己嘅薪金每次都無得落袋，直接「上繳」爸爸，加上朱小坡嘅姨太太鍾意講是非，對朱自清嘅太太一直唔好。朱自清受夠呢種專制行為，憤然離開屋企。1922年，朱自清想緩和同爸爸嘅關係，帶住妻兒返鄉下，點知爸爸發威，搞到佢哋連門口都無得入。兩父子一別就係兩年，直到1925年朱自清收到父親嘅家書，朱小坡喺信入面話自己身體平安，不過就手痛，痛到寫字都難，可能都「果頭近」。朱自清深受家書觸動，諗起八年前同父親離別嘅情景，於是有咗呢篇膾炙人口嘅《背影》。

圖為朱自清同朱小坡，原圖嚟自網絡。