上次講起甲午戰爭，提到清末重臣李鴻章去咗日本議和，期間發生咗槍擊案，扭轉成個局面。

喺1895年3月，光緒帝任命李鴻章為全權大臣，於是李鴻章一行人13日乘坐船去日本馬關，喺春帆樓同日方官員議和。去到21日，日本首相伊藤博文向李鴻章提出停戰條件，包括：日軍佔領大沽、天津、山海關一線所有城池同堡壘；駐紮喺上述地區嘅清軍要將一切軍需用品交俾日本軍隊；天津至山海關嘅鐵路交俾日本軍官管理，以及停戰期間日本軍隊嘅一切駐紮費用開支要由清政府負擔等等。呢啲無理嘅條件梗係被清政府拒絕，亦顯示日方根本無意停戰。

喺3月24日下晝，第三次談判結束之後，李鴻章離開春帆樓，坐轎返驛館。點知當李鴻章就嚟返到驛館嘅時候，日本右翼份子小山豐太郎喺人群衝出，向頂橋開咗一槍，李鴻章傷咗左邊面，當場昏迷。隨行人員嗱嗱聲將李鴻章抬返驛館急救，好彩子彈無打中要害，無幾耐李鴻章就醒返。槍擊案發生後，一啲國家紛紛出嚟譴責日本，日方憂慮會節外生枝，於是態度180度轉變，願意停戰，相信李鴻章自己都估唔到，會因為遇刺而令談判峰迴路轉。喺3月30日，中日簽署停戰條約，4月17日簽署喪權辱國嘅《馬關條約》。

原圖取自網絡。