甲午戰爭期間，清廷同日本喺黃海爆發激戰，致遠號艦長鄧世昌指揮全艦奮力作戰，打到彈藥用晒為止。最後鄧世昌決定，要用致遠號撞沉日軍嘅吉野號，希望作出最後一擊。點知致遠號仲未撞到吉野號嗰時，就被日軍嘅魚雷擊中，爆炸解體。隨從將救生圈掟向落水嘅鄧世昌，但鄧世昌拒絕，話要同戰艦共存亡。呢個時候，佢嘅愛犬「太陽」奮不顧身跳落水，諗住救主人，可見動物同人嘅感情都可以好深厚。

「太陽」跳落水之後，咬住鄧世昌唔俾佢沉，想拉主人返岸邊。但鄧世昌以身殉國嘅主意已決，佢敲打「太陽」，要狗狗離開，但「太陽」死都唔肯放口，於是鄧世昌就攬住「太陽」，最終齊齊葬身大海。

鄧世昌為國犧牲，光緒帝親撰輓聯「此日漫揮天下淚，有公足壯海軍威」，讚揚佢嘅表現，又賜咗塊用黃金鑄成嘅「教子有方」匾額俾鄧母，同埋撥咗十萬兩白銀俾鄧家，最後啲白銀用咗嚟修建鄧世昌嘅衣冠塚同宗祠。

圖為鄧世昌，取自網絡。