近排金庸名著《倚天屠龍記》再被翻拍成電視劇,响八點半播出,對比返鄭少秋版、梁朝偉版、馬景濤版、吳啟華版等等,邊套劇嘅女主角靚啲、神似啲,相信大家心中有數。其實除咗電視劇之外,電影都拍過,阿史講緊26年前嘅《倚天屠龍記之魔教教主》,李連杰、邱淑貞、張敏、黎姿有份做主角嗰套呢,各位史友仲記唔記得?

講返啲角色,邱淑貞飾演嘅小昭靚樣唔駛多講,加埋精靈直率,簡直係經典,至於張敏飾演嘅趙敏郡主,眉宇間帶點英氣,同樣令觀眾留低深刻印象,而扮演周芷若嘅黎姿,一對眼已經殺曬。靚女以外,李連杰同洪金寶等男演員強勢加盟,真係粒粒皆星,當中吳耀漢所扮嘅青翼蝠王韋一笑,雖然戲份唔多,但都好搶鏡。

卡士十足,不過套戲居然爛尾收場?話說套戲去到最後,趙敏臨走前講低,如果要救六大派,就去大都搵佢。不過又有邊個估到,一搵就搵足廿幾年都仲未有聲氣……套戲當年嘅票房大概一千萬多啲,對比返同年《唐伯虎點秋香》嘅四千幾萬、李連杰主演嘅另一套電影《方世玉》嘅三千幾萬,以至暑假檔期上映嘅《超級學校霸王》千八萬票房都追唔到,認真麻麻,據講係續集一直無下文嘅最大「死因」。

劇照取自網絡。