上年被國際刑警發出紅色通緝令嘅印度極度重犯文子星，喺香港因為涉及巨款劫案落網，由於佢有極端組織背景，當局押送文子星去法院應訊時嚴陣布防，仲出動埋反恐特勤隊戒備，係反恐特勤隊首次參與押解任務。身為香港特種部隊之一，反恐特勤隊仲參與唔少重要案件，包括上年鰂魚涌公園發生槍擊案時，隊員曾全副武裝出動到場。

反恐特勤隊（Counter Terrorism Response Unit，CTRU）响十年前成立，負責執行反恐策略、喺有恐襲威脅嘅場所進行反恐巡邏，亦要喺出現恐襲威脅時處理爆炸品、防範生化核輻射等等。為應付唔同情況，隊員常規佩備一支Glock-17半自動手槍、後備彈匣、胡椒噴霧、警棍、急救包同埋通訊機，處理生化事件嗰陣仲要戴防毒面具同著保護衣。喺佢哋架巡邏車入面，仲有急救及醫療設備，例如呼吸輔助器及自動體外心臟除顫器，同埋破門裝備例如油壓剪同切斷器等。

因為隊員需要長時間工作同佩戴重型裝備，所以對隊員體能嘅要求相當高，佢哋每日都需要完成90分鐘嘅體能訓練，以應付日常工作。另外，團隊合作精神亦非常重要，反恐特勤隊不時會同警隊其他部門、政府部門或私人機構合作，舉行模擬恐襲訓練，加強應變能力。

圖片為反恐特勤隊抵達鰂魚涌公園槍擊案現場，取自網絡。