第二次世界大戰尾聲，1945年5月納粹德國首都柏林被攻陷，德國代表分別喺5月7日同8日投降咗兩次，而英美等國認為5月7日係德國投降嘅日子，但蘇聯以及之後嘅俄羅斯就認為5月8日先至正式投降。至於點解會投降兩次，其實係同艾森豪威爾嘅策略有關嘅。

話說喺1945年初，納粹德國已經喺崩潰邊緣，當時英美盟軍同蘇聯分開兩邊進攻柏林，盟軍本來有能力進攻，不過當時盟軍歐洲戰區總司令艾森豪威爾發出電報，指示讓俾蘇聯人攻柏林先。艾森豪威爾呢個決定引起不滿，英美領袖認為由蘇聯攻佔柏林會產生嚴重嘅政治後果。不過原來艾森豪威爾先係最醒嗰個，佢認為當時納粹德國已經將柏林打造成「鋼鐵堡壘」，攻克柏林恐怕至少犧牲10萬士兵。再加上當時美軍已經同納粹德國就投降問題展開討論，預料德軍最終都係會率先向美軍投降，所以無必要親自攻佔柏林。

蘇聯最終喺5月3日以三十萬人傷亡嘅代價，佔領咗柏林，點知德國無人嚟向佢哋投降，之後先知原來德國投降代表去緊英美佔領區。喺5月7日，德國代表約德爾上將同英、美、蘇三個代表簽署德國無條件投降書，唔少英、美、德嘅名將都出席咗儀式，而蘇聯代表就竟然只係一個名不經傳嘅少將，艾森豪威爾可以話係跣咗蘇聯一鑊。

不過蘇聯又點會甘心被人咁樣玩，史太林知道英美舉行德國投降儀式之後，即刻搵嗰個少將算賬，並且响當日向英美兩國發出抗議，由於史太林態度非常強硬，英美兩國唯有派出高級別軍官參加第二次投降儀式，德國亦唯有投降多次。

順帶一提，艾森豪威爾喺1952年當選美國總統。

圖片為德國第二次投降、艾森豪威爾，取自網絡。