著名文學家魯迅嘅代表作《狂人日記》堪稱係中國第一篇現代白話文小說，猛烈抨擊封建禮教制度會「食人」嘅現象。不過，如果無當時《新青年》嘅編輯錢玄同，呢個世界可能就只會有周樹人，而唔會出現魯迅。

錢玄同係浙江吳興人，早年留學日本，曾任北京大學、北京師範大學教授，係「新文化運動」嘅代表人物之一。我哋宜家嘅書寫習慣，包括喺文章入面加入西式標點符號、用阿拉伯數字寫數目、漢字書寫方式改為橫排並且從左向右書寫，都係錢玄同積極提倡白話文嘅成果。

講返錢玄同以及魯迅先，話說1917年錢玄同任職《新青年》編輯，搵咗周樹人、周作人兩兄弟投稿。周作人好快就有稿交，但周樹人就因為對當時中國嘅現狀失望，婉拒錢玄同，仲話：「這中國好比一間鐵屋子，絕無窗戶而萬難破毀，裏面的人們從昏睡入死滅，並不感到臨死的悲哀。而如果驚起了較為清醒的幾個人，反倒使他們感到無可挽救的臨終的苦楚。」錢玄同即刻反駁話：「然而，幾個人既然起來，你不能說決沒有毀壞這鐵屋的希望。」錢玄同呢個辯駁一言驚醒夢中人，當堂令周樹人如醍醐灌頂，於是周樹人化名魯迅，喺《新青年》發表《狂人日記》。而魯迅同錢玄同呢段對話亦被如實記錄喺魯迅小說《呐喊》嘅序言入面。

圖為錢玄同、魯迅。