上次講起麼地道命名來源、捐錢起港大嘅麼地，今次就講吓佢一位好重要嘅朋友──遮打道嘅遮打。遮打1846年喺印度加爾各答出世，有亞美尼亞血統，但父母喺佢細個嘅時候就過咗身。遮打喺加爾各答當地有名嘅馬帝尼耶書院（La Martiniere College）讀書，畢業之後1864年就嚟咗香港工作，投靠家姐同姐夫。

遮打當時喺銀行度做嘢，負責幫客人寫存摺，期間認識咗著名嘅沙宣家族，進入咗歐籍人士嘅社交圈子。1867年佢轉做經紀，從事金條同土地買賣。喺1868年，佢同一樣嚟自印度嘅老友麼地，開咗間公司做地產同股票買賣，累積財富。

喺1886年，遮打就同怡和洋行合作，成立香港九龍碼頭及貨倉有限公司（簡稱：九龍倉），做轉口貿易生意，同時又幫蘇格蘭籍醫生白文信爵士，成立牛奶公司，用3萬蚊响薄扶林興建牧場，飼養80隻英國乳牛，生產新鮮牛奶。喺1889年，佢又同怡和大班凱瑟克，創立香港置地投資及代理有限公司（簡稱：香港置地），游說政府展開「西環至中環海旁填海計劃」，喺填海工程竣工之後，新嘅土地被用嚟做商業發展，成為中區核心，而新嘅海旁大道，就以「遮打」命名。

原圖取自網絡。