「武林至尊，寶刀屠龍，號令天下，莫敢不從！倚天不出，誰與爭鋒？」近排無綫播緊嘅《倚天屠龍記》，入面嘅倚天劍同屠龍刀引起武林中人爭相搶奪。回歸現實之中，早排報道話有個內地工人疑似喺地盤度挖到兩件外形同屠龍、倚天相似嘅刀劍，咁究竟呢啲神兵利器係真實存在，定係金庸作出嚟嘅呢？

章回小說《三國演義》提到，三國梟雄曹操講過句金句：「寧教我負天下人，休教天下人負我。」然後就殺咗好朋友呂伯奢一家，而曹操用嘅殺人兇器就係倚天劍。曹操嗰把「倚天」嘅寶劍同小說《倚天屠龍記》入面一樣，都係削鐵如泥嘅極品。據說曹操把倚天劍係仿照西漢早期嘅玉具設計而成，劍長119厘米。不過，曹操隨身佩帶呢把倚天劍都唔係經常用，都係用嚟傍身多，可以話係佢嘅身份象徵。

當然，金庸筆下嘅倚天劍並唔係相傳曹操嗰把，武俠小說入面真正嘅倚天劍同屠龍刀其實喺金庸手上？話說金庸生前曾經喺個座談會入面提過，佢認識台灣一位人稱「人骨煉劍師」嘅鍛劍師傅，仲專程拜託師傅根據自己小說入面嘅描述，打造咗把真嘅屠龍刀同倚天劍出嚟，從此愛不釋手。

圖為《三國》曹操劇照，原圖嚟自網絡。