之前都有講過清朝末代皇帝溥儀嘅後宮生活，仲提到皇后婉容同妃子文繡嘅故事，今日就講埋溥儀其中一位「貴人」譚玉齡。

話說自從婉容逼走咗文繡，染上煙癮又同人私通之後，溥儀就對佢好反感，想話廢咗呢個皇后，但日本人唔批准。於是，溥儀為咗報復婉容，又唔想娶個日本女人留喺身邊時刻監視住自己，經人介紹下，另外選咗個「貴人」出嚟，呢個就係「祥貴人」譚玉齡。據溥儀另一個貴人李玉琴回憶話，溥儀對譚玉齡頗有好感，譚玉齡嘅死，對溥儀嚟講，可以話係晴天霹靂。

譚玉齡原姓他他拉氏，係北京嘅一個初中生，佢同溥儀結婚果陣先17歲。溥儀喺自傳度話，譚玉齡嘅死，至今依然係一個謎，佢初初得嘅病，據中醫診斷話係傷寒，佢當時嘅情況照道理應該唔會嚴重到致命。但係，自從日本人安排咗個日本醫生嚟醫譚玉齡之後，譚玉齡嘅病情就急轉直下。

嗰位日本醫生初初好熱心，又輸血又打針咁，不過醫咗無幾耐，譚玉齡就突然死咗。溥儀後嚟諗返起佢同譚玉齡經常談論日本人嘅事，極有可能被日本人聽到，所以溥儀懷疑譚玉齡係被日本人害死。據講，譚玉齡喺彌留之際，關心嘅竟然唔係自己嘅病情，而係問：「皇上進膳了沒有？吃的是什麽？」而譚玉齡過世之後，日本人好快拎咗成堆日本女性嘅相叫溥儀選妃，令譚玉齡嘅死更加疑雲密佈。

圖為譚玉齡像，原圖嚟自網絡。