有史友之前去開北角，見到有條街叫做大強街，就問阿史係咪紀念一個叫大強嘅人呢？咁梗係唔係啦，睇返大強街嘅英文叫做Power Street，而附近又有條電氣道、電廠街，大概都估到北角舊時係有間發電廠嘅。

話說喺1888年，商人遮打聯同兩名定例局議員合組供電公司，並選址灣仔海旁，貪嗰度近海，方面攞水。翌年，香港電燈公司正式成立、向公眾招股，同年港燈由英國買入兩部蒸汽發電機組，並正式投產，為港島嘅街燈供電。到咗1914年，當時社會對電力嘅需求不斷增加，於是港燈就响北角設置新發電廠，五年後建成並且正式投產，而附近嘅街道亦改名為大強街（Power Street）、電氣道（Electric Road）。

至於點解Power Street嘅中文會變做「大強街」，據講係因為以前負責翻譯街名嘅師爺，誤會咗Power係指「列強」、「強國」嘅「強」，於是就譯咗做「大強街」。

圖片為北角電廠，取自網絡。