以前讀書嗰陣,有唔少同學仔都參加咗少年警訊。唔講唔知,原來今年已經係少年警訊成立45週年。响1973年9月,當時來自蘇格蘭,做過軍人、職業足球員、新聞電視工作者同公共關係顧問嘅凌基理,受聘來港做警隊嘅總新聞主任。佢留意到當時香港超過500萬人口當中,有一半都係23歲以下嘅年輕人,佢認為警方有需要喺青少年工作方面下工夫,於是好破格咁打算成立少年警訊。

最初外界對呢個計劃非常冷淡,認為家長唔會俾子女同警方接觸,但喺警務處長施禮榮支持下,少年警訊計劃得以推行,喺1974年7月正式成立。到咗今時今日,少年警訊已經累積超過100萬名青少年加入成為會員、目前會員人數達20萬。

1974年,香港電台就製作咗《少年警訊》嘅電視節目,而第一任主持就係而家為人熟悉嘅演員林嘉華。佢曾經喺少年警校受訓、成為警員,後來佢做《少年警訊》主持做得出色,就獲得麗的電視嘅高層賞識,成為藝員。佢話當年自己比較後生,覺得合約條款唔錯,家人又唔反對,於是膽粗粗一試,展開影視生涯。

原圖嚟自網絡。