唔知各位史友屋企有無一兩罐豆豉鯪魚看門口呢？豆豉鯪魚罐頭大家食得多，佢本身有咩故事？趁住上個禮拜佛誕假期，阿史去咗廣州天河區嘅紅專廠創意藝術區行返轉，尋找豆豉鯪魚罐頭嘅身世之謎。

話說紅專廠前身係廣州鷹金錢食品廠，早於19世紀嗰陣，要去外地嘅廣東打工仔都會將鯪魚落啲豆豉，加埋油浸，放入瓦罐封存，夠味之餘又有助保存，咁一路上就唔會餓親。而第一罐豆豉鯪魚响1893年出產，由廣茂香罐頭廠所製，名為鷹金錢罐頭。去到1956年，廣茂香罐頭廠就變身成為廣東罐頭廠，係前蘇聯同中國經濟合作嘅165個重點項目之一，由輕工業部籌建、1958年投產，係當時亞洲最大型嘅罐頭廠。

隨住現代化機械生產需要，罐頭廠2008年遷出，廠房就被活化成文創產業基地。據講，紅專廠呢個名係因為廠區內有唔少紅色磚建成嘅建築物，所以取其諧音叫做「紅專廠」，而紅專廠嘅英文名Redtory係由Red同Factory結合而成，係幾有創意。講咗咁多，開始有少少肚餓，今晚叫史媽整返味豆豉鯪魚炒油麥菜先~

罐頭圖片取自網絡。