位於上海嘅宋慶齡故居紀念館，喺今年年頭已經完成修繕，重新開放。講起宋慶齡，就不得不提佢同丈夫孫中山呢段一開始唔被睇好嘅婚姻。之前同大家提過生咗宋氏六姐弟嘅盛家保姆倪桂珍，佢同丈夫宋嘉樹自從識咗孫中山之後，就一直支持孫中山搞革命。不過，一提到自己個女同孫中山嘅婚事，宋氏夫婦就唔同講法喇。

孫中山嘅秘書初時係由大姐宋靄齡擔任嘅，不過後嚟宋靄齡忙住搞婚事，無暇兼顧秘書工作，就由妹妹宋慶齡幫手分擔。宋慶齡自細就仰慕孫中山，可以喺孫中山身邊工作佢覺得好快樂。終於有一日，宋慶齡向孫中山表白，但孫中山考慮到兩人嘅年齡差距同自己嘅境況，無應承宋慶齡，仲叫佢返去同屋企人商量吓先。

宋慶齡好聽話咁講咗俾屋企人知，宋氏夫婦聽到呢個消息之後又嬲又驚，宋媽媽更加喊住同宋慶齡講：孫中山大你成27歲，又有家室，佢個仔都大過你。宋家上下除咗宋美齡之外，全部都反對宋慶齡同孫中山嘅婚事，宋爸爸仲軟禁宋慶齡添。不過宋慶齡心意已決，漏夜爬窗出走，去日本搵孫中山。

孫中山身邊嘅人亦紛紛反對呢頭親事，不過孫中山就堅定咁話：「如能與她結婚，即使第二天死去亦不後悔。」為咗娶宋慶齡，孫中山仲特登將元配接嚟日本辦離婚手續。宋氏夫婦知道宋慶齡出走之後，已經即刻搭船去日本阻撓，仲當衆鬧咗孫中山一餐。但最令人意想不到嘅一幕出現咗，最後宋爸爸竟然向孫中山下跪，叫佢多多關照自己個女。宋慶齡婚後，宋氏夫婦仲送咗一套古家具同百子綢緞俾宋慶齡做嫁妝，果然父母都係痛錫仔女嘅。

圖為宋慶齡同孫中山，原圖嚟自網絡。