如果有人話訓練一百日就可以無懼子彈、練夠四百日就可以飛起嚟，大家會點諗？唔係講笑，晚清時期真係有民眾相信義和團嘅「巫術」。義和團發源於山東，本身係民間秘密組織，活躍於山東、河南、河北一帶，透過傳授武藝、派傳單，組織群眾進行反清活動。不過到咗19世紀末，隨住帝國主義入侵、基督教傳入，義和團就開始同滿清企埋同一陣線，變成「扶清滅洋」。

義和團崇拜唔同神，包括玉皇大帝、西楚霸王項羽、關公、諸葛亮等傳說同歷史人物。响1898年10月，義和團首領趙三多喺山東冠縣率眾起義，攻打教堂，其後山東各地拳會同大刀會紛紛響應，展開反教會侵略，義和團嘅勢力範圍逐漸擴展到華北、東北各省。

佢哋行為後來得到清廷嘅認可，朝廷仲話村民設團自衛係符合古代「守望相助」之義，唔應該禁止。如是者，令義和團更加大膽、群情洶湧，破壞鐵路同電線。之後仲進入北京，周圍襲擊外國人同基督徒，又攻擊外國使館、機構同教堂，再加上清廷向西方列強宣戰，觸發英、美、德、法、俄、日、意、奧八國聯軍入侵中國。

原圖取自網絡。