香港以前除咗有英警、印警、本地華警,响1922年開始仲喺山東威海衛招募警察,成為香港警隊不可或缺嘅一部份。當年港英政府做乜要响威海衛招募警察呢?原來係同印度阿姆利則慘案以及香港海員大罷工兩件歷史事件有關嘅。

印度响1919年4月發生阿姆利則慘案,有英軍向印度民眾開槍,造成過千人傷亡,事件導致喺香港嘅印度警察產生強烈反英情緒,之後1922年香港爆發海員大罷工,迅速癱瘓香港,當時港英政府認為係本地華警同情同包庇,所以搵唔到煽動罷工者嘅消息。兩件事件發生後,港英政府質疑印度警察同本地華人警察嘅忠誠,於是响同樣係英國殖民地嘅威海衛招募警察嚟香港,除咗月薪之外,仲提供船費同海外僑居津貼。

第一批威海衛警察响威海衛接受6個月訓練後,於1923年3月20日抵港。到咗1930年,英國向國民政府交還劉公島以外嘅威海衛租借地,並且續租劉公島直至1940年被日本佔據為止,但港英政府依然繼續招募威海衛人做警察。1949年以後,內地移民湧到香港,部份嚟自其他地方嘅人為咗投考,不惜假扮威海衛人,警方唯有用妙計拆招:考方言。當年有唔少人過到初選同面試,點知埋門一腳撻Q。去到1958年,因為太多人冒充威海衛人,以及太難請到真正威海衛人,當局於是取消曬啲津貼。

喺高峰時期,威海衛警察佔警察整體人數五分之一,係警隊嘅骨幹力量,佢哋主要被派去衝鋒隊、駐守山頂警署同港督府等重要建築。

圖片為第一批威海衛警察喺威海大操場接受檢閱,取自網絡。